RECUEIL DES DAMES[1587]
I, 3 Sur la reyne d'Escosse, jadis reyne de nostre France

"Ainsin donc qu'elle commançoit à vouloir sortir du port, et que les rames commançoient à se vouloir mouiller, elle y vit entrer en plaine mer, et tout à coup à sa veue, s'enfoncer ung navire devant elle et se perir, et la pluspart des mariniers se noyer, pour n'avoir pas bien pris le courant et le fond; ce qu'elle voyant, s'escria incontinant: «Ah! mon Dieu! quelle augure de voyage est cecy!» Et la gallere estant sortie du port, et s'estant eslevé un petit vent frais, on commancea à faire voille, et la chiorme se reposer. Elle, sans songer à autre action, s'appuye les deux bras sur la poupe de la gallere du costé du timon, et se mist à fondre en grosses larmes jettant tousjours ses beaux yeux sur le port et le lieu d'où elle estoit partie, prononceant tousjours ces tristes parolles: «A Dieu France! A Dieu France!» les repetant à chasque coup; et luy dura cest exercice dolent près de cinq heures jusques qu'il commencea à faire nuict, et qu'on lui demanda si elle ne se vouloit point oster de là et souper ung peu. Alors, redoublant ses pleurs plus que jamais, dict ces motz - «C'est bien asteure, ma chere France, que je vous perds du tout de veue, puisque la nuict obscure est jalouse de mon contentement de vous veoir tant que j'eusse peu et m'aporte ung voille noir devant mes yeux pour me priver d'un tel bien. A Dieu doncq, ma chere France, je ne vous verray jamais plus!»
Ainsin se retira, disant qu'elle avoit faict tout le contraire de Didon, qui ne fist que regarder la mer quand Æneas se despartist d'avec elle, et elle regardoit tousjours la terre. Elle voulut se coucher sans n'avoir mangé qu'une sallade et ne voulut descendre en bas dans la chambre de poupe; mais on luy fist dresser la traverse de la gallere en haut de la poupe, et luy dressa-on là son lict: et reposa peu, n'oubliant nullement ses souspirs et larmes. Elle commanda au tymonnier, sitost qu'il seroit jour, s'il voyoit et descouvroit encore le terrain de la France, qu'il l'esveillast et ne craignist de l'appeller. A quoy la fortune la favorisa; car le vent s'estant cessé, et aiant heu recours aux rames, on ne fist guieres de chemin ceste nuict: si bien que, le jour paressant, parust encor le terrain de France; et, n'ayant failly le tymonnier au commandement qu'elle luy avoit faict, elle se leva sur son lict, et se mist à contempler la France encor, et tant qu'elle peut. Mais la gallere s'eslongnant, elle eslongna son contantement, et ne vit plus son beau terrain. Adonc redoubla encore ces mots: «A Dieu la France! Cela est faict. A Dieu la France! je pense ne vous veoir jamais plus!»
Si desira-elle ceste fois qu'une armée d'Angleterre parust, de laquelle nous estions fort menassez, afin qu'elle eust subject et fust contrainte de rellascher en arriere, et se sauver au port d'où elle estoit partie; mais Dieu en cela ne la voulust favoriser à ses souhaitz, car, sans aucun empeschement, nous arrivasmes au Petit-Lit; dont sur le navigage je feray ce petit incident: que le premier soir que nous fusmes embarquez, le seigneur de Chastellard, qui despuis fust executé en Escosse par son outrecuidance, et non pour crime, comme je diray (qui estoit gentil cavallier et homme de bonne espée et bonnes lettres), ainsin qu'il vist qu'on allumoit le fanal, il dict ce gentil mot: «Il ne seroit poinct besoing de ce fanal ny de ce flambeau, pour nous esclairer en mer, car les beaux yeux de ceste Reyne sont assez esclairans et bastans pour esclairer de leur beaux feux toute la mer, voire l'embraser pour un besoing.»
Faut noter qu'un jour avant, qui fut ung dimanche matin, que nous arrivasmes en Escosse, il s'esleva ung si grand brouillard, que nous ne pouvions pas veoir despuis la poupe jusques à l'arbre de la gallere, en quoy les pilottes et comites furent fort estonnez; si bien que par necessité, il fallust mouiller l'ancre en plaine mer, et jetter la sonde pour sçavoir où nous estions. Ce brouillard dura tout le long d'ung jour, toute la nuict, jusques au lendemain matin à huict heures, que nous nous trouvasmes environnez d'un'infinité d'escueilz; si bien que, si nous fussions allez en avant ou à costé, nous eusssions donné à travers et nous fussions tous peris. De quoy la Reyne disoit que, pour son particulier, ne s'en fut guieres souciée, ne souhaittant rien tant que la mort; mais elle ne l'eust pas souhaittée ny voulu, pour le general, pour tout le royaume d'Escosse. Ayant doncq' recongneu et veu, le matin de ce brouillard levé, le terrain d'Escosse, il y en heut qui augurarent sur ledict brouillard, qu'il signifioit qu'on alloit prendre terre dans ung royaume brouillé, brouillon et mal plaisant.
Nous allasmes entrer et prendre terre au Petit-Lit, où soudain les principaux de là et de l'Islebourg accoururent pour recueillir leur Reyne; et ayant sejourné deux heures seullement au Petit-Lit, fallust s'acheminer à l'lslebourg qui n'est qu'à une petitte lieue de là. La Reyne y alla à cheval, et ses Dames et Seigneurs sur des haquenées guilledines du pays, telles quelles, et harnechées de mesmes; dont, sur tel apareil, la Reyne se mist à pleurer et dire: que ce n'estoient pas les pompes, les appretz, les magnificences ny les superbes montures de la France, dont elle avoit jouy si longtemps; mais puisqu'il luy falloit changer son paradis en ung enfer, qu'il falloit prendre patience. Et qui pis est, le soir ainsin qu'elle se vouloit coucher, estant logée en bas en l'abbaye de l'Islebourg (qui est certes un beau bastiment et ne tient rien du pays), vindrent soubs sa fenestre cinq ou six cents marauts de la ville luy donner l'aubade de meschants viollons et petits rebecz, dont il n'y en a faute en ce pays là - et se mirent à chanter des pseaumes tant mal chantez et si mal accordez que rien plus. Hé! quelle musique et quel repoz pour sa nuict!
Le lendemain matin on luy cuyda tuer son ausmonnier devant son logis; et s'il ne se fust sauvé de vitesse dedans sa chambre il estoit mort et en heussent faict de mesmes (comme ils feirent despuis) à son secretaire David, lequel, d'autant qu'il estoit d'esprit, la Reyne l'aymoit pour le maniement de ses affaires: mais on le luy tua dedans sa salle, si près d'elle que le sang luy en rejallist sur sa robbe, et luy tumba mort à ses pieds.
Quelle indignité! Ils luy en ont bien faict d'autres; dont ne se faut estonner s'ils ont parlé mal d'elle. Ce tour faict à son ausmonnier, elle en vint si triste et faschée qu'elle dict: «Voilà un beau commancement d'obissance et de recueil de mes subjectz! Je ne sçay quelle en sera la fin; mais je la prevois très-mauvaise.» Ainsin que la pauvre princesse en cela s'est monstrée despuis une seconde Cassandre en prophetie, comme elle estoit en beauté."